ಬೆಳಗಾವಿ : ವೈದ್ಯಕೀಯ ವೃತ್ತಿ ಒಂದು ಪವಿತ್ರ ಸೇವೆ. ಐದು ವರ್ಷಗಳ ಕಾಲ ಅಧ್ಯಯನದಲ್ಲಿ ಪರಿಶ್ರಮದಿಂದ ಈ ವೃತ್ತಿಯ ಜ್ಞಾನ ಅರಿಯಬೇಕು ಎಂದು ಬಂಜೆತನ ಹಾಗೂ ಸ್ತ್ರೀರೋಗ ತಜ್ಞ ಡಾ.ದತ್ತಪ್ರಸಾದ ಗಿಜರೆ ಹೇಳಿದರು.

ತಾಲೂಕಿನ ಬಸವನ ಕುಡಚಿ ದೇವರಾಜ ಅರಸ್‌ ಕಾಲನಿಯ ಶ್ರೀಮತಿ ಚಿನ್ನಮ್ಮ ಹಿರೇಮಠ ವೃದ್ಧಾಶ್ರಮದಲ್ಲಿಆಯೋಜಿಸಿದ್ದ ಕಾರ‍್ಯಕ್ರಮದಲ್ಲಿವಿದ್ಯಾರ್ಥಿಗಳಿಗೆ ಸಮವಸ್ತ್ರ ಹಾಗೂ ವೈದ್ಯಕೀಯ ಸಾಮಗ್ರಿ ವಿತರಿಸಿ ಅವರು ಮಾತನಾಡಿದರು. ಕಾರಂಜಿಮಠದ ಗುರುಸಿದ್ಧ ಸ್ವಾಮೀಜಿ ಮಾತನಾಡಿ, ''ಜೀವನದಲ್ಲಿ ಸಾಧಿಸಲು ಸಾಕಷ್ಟು ದಾರಿಗಳಿವೆ. ನೀವು ಆಯ್ದುಕೊಂಡಿರುವ ದಾರಿ ಅತ್ಯಂತ ಪವಿತ್ರವಾದದ್ದು. ಶ್ರದ್ಧೆ ನಿಷ್ಠೆಯಿಂದ ವೈದ್ಯಕೀಯ ಕೋರ್ಸ್‌ ಪೂರೈಸಿ ಸಮಾಜಮುಖಿಯಾಗಿ ಸೇವೆ ಸಲ್ಲಿಸಬೇಕು. ಹಣವೇ ಸರ್ವಸ್ವವಲ್ಲ, ವೈದ್ಯಕೀಯ ವೃತ್ತಿಯನ್ನು ಹಣಕ್ಕೆ ಅರ್ಪಿಸಬಾರದು,'' ಎಂದರು.

ಪ್ರಾಸ್ತಾವಿಕ ಮಾತನಾಡಿದ ಡಾ.ಮಹಾಂತೇಶ ರಾಮಣ್ಣವರ, ವೈದ್ಯ ವಿದ್ಯಾರ್ಥಿಗಳು ತಮ್ಮ ಜವಾಬ್ದಾರಿ ಅರಿತು ಉತ್ತಮವಾದ ಶಿಕ್ಷಣ ಪಡೆಯಬೇಕು ಎಂದರು. ವೃದ್ಧಾಶ್ರಮದ ಸಂಯೋಜಕ ಎಂ.ಎಸ್‌. ಚೌಗಲಾ ಮಾತನಾಡಿದರು. ಡಾ.ರೋಹಿಣಿ ನೇಗಿನಾಳ. ಡಾ. ಸುಭಾಷ ನೇಗಿನಹಾಳ, ಕಿರಣ್‌ ಚೌಗುಲಾ, ಮಹೇಶ ಗುರನಗೌಡರ, ಸುಜಿತ ಮೊರಬದ, ಅಜಯ್‌ ಪೂಜಾರಿ ಇತರರಿದ್ದರು. ಸಂಕೇತ ಕುಲಕರ್ಣಿ, ಓಂಶ್ರೀ ಕಾರ್ಯಕ್ರಮ ನಿರ್ವಹಿಸಿದರು.