ಬೆಂಗಳೂರಿನ ಬಂಧು ಫಕೀರಿಯಮ್ಮ!

ಬೆಂಗಳೂರಿನಲ್ಲೇ ಹುಟ್ಟಿ ಬೆಳೆದು ಹಲವು ವರ್ಷಗಳಿಂದ ಪೌರ ಕಾರ್ಮಿಕರಾಗಿ ದುಡಿದು ನಿವೃತ್ತರಾಗಿರುವ 72 ವರ್ಷದ ಫಕೀರಿ ಅವರಿಗೆ ಈ ಬಾರಿಯ ಕನ್ನಡ ರಾಜ್ಯೋತ್ಸವ ಪ್ರಶಸ್ತಿ ಒಲಿದಿದೆ. ಮೈಸೂರು ರಸ್ತೆಯ ಹಳೆ ಗುಡ್ಡದಹಳ್ಳಿಯಲ್ಲಿನೆಲೆಸಿರುವ ಫಕೀರಿಯಮ್ಮ ಅವರಿಗೆ 4 ಮಂದಿ ಪುತ್ರರು ಹಾಗೂ ಇಬ್ಬರು ಪುತ್ರಿಯರು. ಇವರಲ್ಲಿಮೂರು ಮಂದಿ ಪೌರ ಕಾರ್ಮಿಕರಾಗಿಯೇ ಸೇವೆ ಸಲ್ಲಿಸುತ್ತಿದ್ದಾರೆ. ಚರಂಡಿ, ಒಳಚರಂಡಿ ವ್ಯವಸ್ಥೆ ಸಮರ್ಪಕವಾಗಿಲ್ಲದ ಕಾಲದಿಂದಲೂ ಫಕೀರಿ ಅವರು ಪೌರ ಕಾರ್ಮಿಕರಾಗಿ ದುಡಿದಿದ್ದಾರೆ. ಮದುವೆಯಾದ ಕೆಲವೇ ವರ್ಷಗಳಲ್ಲಿಪತಿಯನ್ನು ಕಳೆದುಕೊಂಡ ಅವರು, ಸ್ವಚ್ಛತಾ ಕಾರ್ಯ ನಿರ್ವಹಿಸುತ್ತಲೇ ಮಕ್ಕಳನ್ನು ಸಲಹಿದ್ದಾರೆ. 1972-73ರಲ್ಲಿಪೌರ ಕಾರ್ಮಿಕರಾಗಿ ಸೇವೆಗೆ ಸೇರಿದ ಅವರು, ಹಗಲಿರುಳು ನಗರದ ಸ್ವಚ್ಛತೆಗಾಗಿ ದುಡಿದಿದ್ದಾರೆ.