ಹೂವಿನ ಬೆಲೆ ಕುಸಿತ, ಬೆಳೆಗಾರರು ಕಂಗಾಲು

ವಿಕ ಸುದ್ದಿಲೋಕ ಬೆಂಗಳೂರು ಗ್ರಾಮಾಂತರ ಹೂವು ಬೆಲೆ ಏಕಾಏಕಿ ಕುಸಿತದಿಂದ ರೈತರು ಕಂಗಾಲಾಗಿದ್ದಾರೆ. ಮಾರುಕಟ್ಟೆಯಲ್ಲಿಬಹುತೇಕ ಹೂಗಳು ಪ್ರತಿ ಕೆಜಿ 40 ರಿಂದ 50 ರೂಪಾಯಿಗೆ ಮಾರಾಟವಾಗುತ್ತಿದೆ. ಕನಿಷ್ಠ ಬೆಲೆ ಮಾತ್ರ ದೊರೆಯುತ್ತಿದೆ. ಬೆಂಗಳೂರು ಗ್ರಾಮಾಂತರ ಜಿಲ್ಲೆಯ ದೊಡ್ಡಬಳ್ಳಾಪುರ, ದೇವನಹಳ್ಳಿ ತಾಲೂಕಿನಲ್ಲಿಹೆಚ್ಚಿನ ಪ್ರಮಾಣದಲ್ಲಿಹೂವು ಬೆಳೆಯಲಾಗುತ್ತದೆ. ಈ ಬಾರಿ ಗಣೇಶ ಹಬ್ಬದ ವೇಳೆ ಹೆಚ್ಚಾಗಿ ಬೆಳೆಗಾರರು ಹೂವು ಬೆಳೆಯನ್ನು ಬೆಳೆಯಲು ಮುಂದಾಗಿದ್ದರು. ಇದರಿಂದ ಇದೀಗ ಉತ್ತಮ ಫಸಲು ಕೂಡ ಬರುತ್ತಿದೆ. ಆದರೆ, ಸದ್ಯ ದೀಪಾವಳಿವರೆಗೂ ಯಾವುದೇ ಹಬ್ಬದ ಇಲ್ಲದಿರುವುದರಿಂದ, ಬೇಡಿಕೆ ಕುಸಿತವಾಗಿದೆ. ಮಾರುಕಟ್ಟೆಯಲ್ಲಿಬಹುತೇಕ ಹೂಗಳು ಪ್ರತಿ ಕೆಜಿಗೆ 50 ರೂಪಾಯಿ ಒಳಗೆ ಮಾರಾಟವಾಗುತ್ತಿದೆ. ಇದಲ್ಲದೆ, ನೂರು ರೂಪಾಯಿಗೆ ಮೂರು ಮಾರು ಹೂವು ಮಾರಾಟ ಮಾಡುತ್ತಿದ್ದು, ಗ್ರಾಹಕರಿಗೆ ಕಡಿಮೆ ಬೆಲೆಯಲ್ಲಿನ ಗುಣಮಟ್ಟದ ಹೂವು ದೊರೆಯುತ್ತಿದೆ. ಎಷ್ಟಿದೆ ಬೆಲೆ?: ದಸರಾ ಸಮಯದಲ್ಲಿಹೂವಿಗೆ ಉತ್ತಮ ಬೆಲೆ ಸಿಕ್ಕಿತ್ತು. ಆದರೆ, ಪ್ರತಿ ವರ್ಷಕ್ಕೆ ಹೋಲಿಸಿದರೆ ಈ ಬಾರಿ ಬೆಲೆ ಕಡಿಮೆ ಇದ್ದರೂ ಸಹ, ಸಮಾಧಾನಪಡುವಂತಿತ್ತು. ಈಗ ರೈತರಿಗೆ ಪ್ರತಿ ಕೆಜಿ ಹೂವಿಗೆ 10ರಿಂದ 20ರೂಪಾಯಿ ಮಾತ್ರ ಸಿಗುತ್ತಿದೆ. ಇದರಿಂದ ಬೆಳೆ ಬೆಳೆಯಲು ವೆಚ್ಚ ಮಾಡಿದಷ್ಟು ಬಂಡಾವಳ ಕೂಡ ಕೈಸೇರುವುದು ಅನುಮಾನ ಎಂಬಂತಾಗಿದೆ. ಇದರ ಜತೆಗೆ ಹೂಗಳನ್ನು ತಂದು ಕಟ್ಟಿ ಮಾರುವವರಿಗೂ ಹೆಚ್ಚೇನು ಲಾಭ ಸಿಗುತ್ತಿಲ್ಲ. ಉತ್ತಮವಾದ ಹೂಗಳು ಪ್ರತಿ ಕೆಜಿಗೆ 40 ರೂ.ಗೆ ಮಾರಾಟವಾಗುತ್ತಿದೆ. ಇನ್ನೂ ದೀಪಾವಳಿ ವೇಳೆಗೂ ಈ ಬಾರಿ ಹೆಚ್ಚು ಬೆಲೆ ಸಿಗುವುದು ಅನುಮಾನ ಎನ್ನಲಾಗುತ್ತಿದೆ. ಕಸಕ್ಕೆ ಸೇರಿದ ಹೂವು: ಹೂವಿಗೆ ಉತ್ತಮ ಬೆಲೆ ಇಲ್ಲದಿರುವುದರಿಂದ ಹಾಗೂ ಬೇಡಿಕೆ ಕಡಿಮೆ ಇರುವ ಕಾರಣ, ಎಸೆಯುವ ಪರಿಸ್ಥಿತಿ ನಿರ್ಮಾಣವಾಗಿದೆ. ದೊಡ್ಡಬಳ್ಳಾಪುರ ಎಪಿಎಂಸಿ ಸೇರಿದಂತೆ ನಾನಾ ಕಡೆಗಳಲ್ಲಿಹೂಗಳನ್ನು ಎಸೆದಿರುವುದು ಇದಕ್ಕೆ ನಿದರ್ಶನ.