ಪ್ರಬಂಧ

Contributed by: Jaya shree|Vijaya Karnataka•
the strengths and challenges of generation z an essay
ಪ್ರಬಂಧದ ವಿಷಯ

ಜೆನ್ ಜಿ ಗಳ ಸಾಮರ್ಥ್ಯ ಮತ್ತು ಸವಾಲುಗಳು
ಇಂಟ್ರೊ

ಇತ್ತೀಚಿನ ದಿನಗಳಲ್ಲಿನಾವು ಅತಿ ಹೆಚ್ಚು ಕೇಳುತ್ತಿರುವ ಪದವೆಂದರೆ ಜೆನ್ ಜಿ! ಜಾಗತಿಕ ಕ್ರಾಂತಿಗಳಿಗೆ ಮುನ್ನುಡಿ ಬರೆಯುವ ಶಕ್ತಿ ಹೊಂದಿರುವಂತೆಯೇ ಅನಪೇಕ್ಷಿತ ವರ್ತನೆಗಳಿಂದಾಗಿ ಟೀಕೆಗೂ ಗುರಿಯಾಗುತ್ತಿದ್ದಾರೆ ಜೆನ್ ಜೀ ಗಳು. ಈ ಹಿನ್ನೆಲೆಯಲ್ಲಿಜೆನ್ ಜಿ ಹೊಂದಿರುವ ಸಾಮರ್ಥ್ಯ ಮತ್ತು ಸವಾಲುಗಳ ಸಂಕ್ಷಿಪ್ತ ಚರ್ಚೆ ಇಲ್ಲಿದೆ.

==============

ಜೆನ್ ಜಿ ಚಿಕ್ಕ ವಯಸ್ಸಿನಿಂದಲೇ ಇಂಟರ್ನೆಟ್ ಮತ್ತು ಡಿಜಿಟಲ್ ತಂತ್ರಜ್ಞಾನದೊಂದಿಗೆ ಬೆಳೆದ ಮೊದಲ ಪೀಳಿಗೆಯಾಗಿದೆ. ಇದು ಅವರನ್ನು ಡಿಜಿಟಲ್ ಪರಿಕರಗಳು, ಸಾಮಾಜಿಕ ಮಾಧ್ಯಮ ಮತ್ತು ಆನ್ ಲೈನ್ ಸಂವಹನ ವೇದಿಕೆಗಳೊಂದಿಗೆ ಅಸಾಧಾರಣವಾಗಿ ಬೆಸೆದಿದೆ. ಅವರ ತಾಂತ್ರಿಕ ಜ್ಞಾನವು ಹೊಸ ತಂತ್ರಜ್ಞಾನಗಳಿಗೆ ತ್ವರಿತವಾಗಿ ಹೊಂದಿಕೊಳ್ಳಲು ಮತ್ತು ಕೆಲಸದ ಸ್ಥಳಕ್ಕೆ ನವೀನ ಪರಿಹಾರಗಳನ್ನು ತರಲು ಅನುವು ಮಾಡಿಕೊಡುತ್ತದೆ. ಜೆನ್ ಜಿ ಗಳು ಚಿಂತನೆಯ ಹೊಸ ಮಾರ್ಗಗಳನ್ನು ಅನ್ವೇಷಿಸುತ್ತಿರುವುದಕ್ಕೆ ಹೆಸರುವಾಸಿಯಾಗುತ್ತಿದ್ದು, 1997 ಮತ್ತು 2012ರ ನಡುವೆ ಜನಿಸಿದ ನವ ತರುಣ-ತರುಣಿಯರನ್ನು ಜಗತ್ತಿನಾದ್ಯಂತ ಜೆನ್ ಜಿ(ಜನರೇಷನ್ ಝೆಡ್ )ಗಳೆಂದು ಕರೆಯಲಾಗುತ್ತಿದೆ.

ಜೆನ್ ಜಿ ಗಳ ಸಾಮರ್ಥ್ಯಗಳು

ಸಾಮಾಜಿಕ ಮತ್ತು ಪರಿಸರ ಸಮಸ್ಯೆಗಳಿಗೆ ಬದ್ಧತೆ: ಇವರು ಸಾಮಾಜಿಕ ನ್ಯಾಯ, ಪರಿಸರ ಸುಸ್ಥಿರತೆ ಮತ್ತು ಕಾರ್ಪೊರೇಟ್ ಜವಾಬ್ದಾರಿಯ ಬಗ್ಗೆ ಹೆಚ್ಚು ಕಾಳಜಿ ವಹಿಸುತ್ತಿದ್ದಾರೆ. ಉದಾಹರಣೆಗೆ ಸ್ವೀಡಿಷ್ ಪರಿಸರ ಕಾರ್ಯಕರ್ತೆ ಗ್ರೇಟಾ ಥನ್ ಬರ್ಗ್ ಹವಾಮಾನ ಬದಲಾವಣೆಯ ವಿರುದ್ಧದ ಹೋರಾಟದ ಜಾಗತಿಕ ಸಂಕೇತವಾಗಿದ್ದಾರೆ.

ಕೆಲಸ ಮತ್ತು ಜೀವನದ ನಡುವೆ ಸಮತೋಲನ: ಹಿಂದಿನ ತಲೆಮಾರುಗಳಿಗಿಂತ ಭಿನ್ನವಾಗಿ, ಜೆನ್ ಜಿ ಕೆಲಸ ಮತ್ತು ಜೀವನ ಸಮತೋಲನಕ್ಕೆ ಹೆಚ್ಚಿನ ಮೌಲ್ಯವನ್ನು ನೀಡುತ್ತದೆ. ಇದು ಅವರ ವೃತ್ತಿಪರ ಮತ್ತು ವೈಯಕ್ತಿಕ ಜೀವನದ ನಡುವೆ ಆರೋಗ್ಯಕರ ಸಮತೋಲನವನ್ನು ಕಾಯ್ದುಕೊಳ್ಳಲು ಅನುವು ಮಾಡಿಕೊಡುತ್ತದೆ.

ಉದ್ಯಮಶೀಲತಾ ಮನೋಭಾವ: ಜೆನ್ ಜಿ ನ ಅನೇಕ ಸದಸ್ಯರು ಉದ್ಯಮಶೀಲರಾಗಿದ್ದಾರೆ ಮತ್ತು ತಮ್ಮದೇ ಆದ ಅವಕಾಶಗಳನ್ನು ಸೃಷ್ಟಿಸಿಕೊಳ್ಳಲು ಪ್ರೇರೇಪಿತರಾಗಿದ್ದಾರೆ. ಈ ಪೀಳಿಗೆಯು ತಮ್ಮದೇ ಆದ ವ್ಯವಹಾರಗಳನ್ನು ಪ್ರಾರಂಭಿಸಲು ಅಥವಾ ಸ್ವತಂತ್ರ ಕೆಲಸದಲ್ಲಿತೊಡಗಿಸಿಕೊಳ್ಳಲು ಹೆದರುವುದಿಲ್ಲ. ತಂತ್ರಜ್ಞಾನದೊಂದಿಗಿನ ಅವರ ಕುತೂಹಲವು ಕೃತಕ ಬುದ್ಧಿಮತ್ತೆ, ಬ್ಲಾಕ್ ಚೈನ್ ಮತ್ತು ಸೈಬರ್ ಭದ್ರತೆಯಂತಹ ಕ್ಷೇತ್ರಗಳಲ್ಲಿಕ್ರಾಂತಿಕಾರಿ ನಾವೀನ್ಯತೆಗಳಿಗೆ ಕಾರಣವಾಗಿದೆ.

ಸಾಮಾಜಿಕ ಬದಲಾವಣೆಯ ತುಡಿತ: ಜೆನ್ ಜಿ ಗಳು ಸಾಮಾಜಿಕ ಬದಲಾವಣೆಗಾಗಿ ಹಂಬಲಿಸುತ್ತಿದ್ದಾರೆ. ಹವಾಮಾನ ಬದಲಾವಣೆ, ಜನಾಂಗೀಯ ಸಮಾನತೆ ಮತ್ತು ಮಾನಸಿಕ ಆರೋಗ್ಯದಂತಹ ನಿರ್ಣಾಯಕ ಸಮಸ್ಯೆಗಳ ಬಗ್ಗೆ ಜಾಗೃತಿ ಮೂಡಿಸಲು ಅವರು ಸಾಮಾಜಿಕ ಮಾಧ್ಯಮ ಮತ್ತು ಇತರ ಡಿಜಿಟಲ್ ಪ್ಲಾಟ್ ಫಾಮ್ ರ್ ಗಳನ್ನು ಬಳಸಿಕೊಳ್ಳುತ್ತಿದ್ದಾರೆ.

ನಾಯಕತ್ವ ಮತ್ತು ಪ್ರಭಾವ: ತಮ್ಮ ಚಿಕ್ಕ ವಯಸ್ಸಿನ ಹೊರತಾಗಿಯೂ, ಅನೇಕ ಜೆನ್ ಜಿ ವ್ಯಕ್ತಿಗಳು ಈಗಾಗಲೇ ವಿವಿಧ ವಲಯಗಳಲ್ಲಿನಾಯಕತ್ವದ ಪಾತ್ರಗಳನ್ನು ವಹಿಸಿಕೊಂಡಿದ್ದಾರೆ. ಅವರು ಸಹಾನುಭೂತಿ, ಹೊಂದಿಕೊಳ್ಳುವಿಕೆ ಮತ್ತು ಸಹಯೋಗದ ವಿಧಾನದೊಂದಿಗೆ ಮುನ್ನಡೆಯುವ ಸಾಮರ್ಥ್ಯಕ್ಕೆ ಹೆಸರುವಾಸಿಯಾಗಿದ್ದಾರೆ. ಅವರ ನಾಯಕತ್ವ ಶೈಲಿಯು ಸಾಮಾನ್ಯವಾಗಿ ಪಾರದರ್ಶಕತೆ, ಮುಕ್ತ ಸಂವಹನ ಮತ್ತು ಬಲವಾದ ಉದ್ದೇಶದ ಪ್ರಜ್ಞೆಯನ್ನು ಒತ್ತಿಹೇಳುತ್ತದೆ.

ಭಾರತದ ಜೆನ್ ಜಿ ಸಾಧಕರು: ಕೇವಲ 16 ವರ್ಷ ವಯಸ್ಸಿನಲ್ಲೇ ಕೃತಕ ಬುದ್ಧಿಮತ್ತೆಯ ಸ್ಟಾರ್ಟಪ್ ಅನ್ನು ಸ್ಥಾಪಿಸಿದ ಪ್ರಾಂಜಲಿ ಅವಸ್ಥಿ, ಚಿಕ್ಕ ವಯಸ್ಸಿನಲ್ಲಿಯೇ ಲಾಜಿಸ್ಟಿಕ್ಸ್ ಮತ್ತು ಕೊರಿಯರ್ ಸ್ಟಾರ್ಟಪ್ ಅನ್ನು ಪ್ರಾರಂಭಿಸಿದ ತಿಲಕ್ ಮೆಹ್ತಾ, ಆರೋಗ್ಯ-ತಂತ್ರಜ್ಞಾನ ಮತ್ತು ಎಐ ಆರೋಗ್ಯ ರಕ್ಷಣಾ ಪರಿಹಾರಗಳನ್ನು ನಿರ್ಮಿಸುವ ಪ್ರವರ್ತಕ ಯುವ ನಾವೀನ್ಯಕಾರರಾದ ಜೈ ವರ್ಧನ್ ತ್ಯಾಗಿ ಮತ್ತು ಸಿದ್ಧಾರ್ಥ ನಂದ್ಯಾಲ, ಸಾಂಪ್ರದಾಯಿಕ ಭಾರತೀಯ ಸಂಗೀತವನ್ನು ಜಾಗತಿಕವಾಗಿ ಜನಪ್ರಿಯಗೊಳಿಸಿದ ಪ್ರಸಿದ್ಧ ಶಾಸ್ತ್ರೀಯ ಮತ್ತು ಜಾನಪದ ಗಾಯಕಿ ಹಾಗೂ ಬಿಹಾರದ ಅತ್ಯಂತ ತರುಣ ಶಾಸಕಿ ಮೈಥಿಲಿ ಠಾಕೂರ್ , ಮೊದಲಾದ ಜೆನ್ ಜಿ ಗಳು ಏನೆಲ್ಲಮಾಡಬಹುದು ಎಂಬುದಕ್ಕೆ ಮಾದರಿಯಾಗಿದ್ದಾರೆ.

ಜೆನ್ ಜಿ ಗಳು ಎದುರಿಸುತ್ತಿರುವ ಸವಾಲುಗಳು

ಮಾನಸಿಕ ಆರೋಗ್ಯ ಬಿಕ್ಕಟ್ಟು: ಜೆನ್ ಜಿ ಗಳು ಹಿಂದಿನ ಯಾವುದೇ ಪೀಳಿಗೆಗಿಂತ ಹೆಚ್ಚಿನ ಮಟ್ಟದ ಖಿನ್ನತೆ ಮತ್ತು ಆತಂಕವನ್ನು ಎದುರಿಸುತ್ತಿದ್ದಾರೆ ಎಂದು ಹಲವಾರು ಸಂಶೋಧನೆಗಳು ವರದಿ ಮಾಡಿವೆ. ಸಾಮಾಜಿಕ ಮಾಧ್ಯಮಕ್ಕೆ ನಿರಂತರವಾಗಿ ಒಡ್ಡಿಕೊಳ್ಳುವುದು ಹೋಲಿಕೆಯ ಸಂಸ್ಕೃತಿಯನ್ನು ಬೆಳೆಸಿದೆ.

ಜೀವನದ ಅರ್ಥ ಮತ್ತು ಉದ್ದೇಶದ ನಷ್ಟ: ತಮ್ಮ ಬೆರಳ ತುದಿಯಲ್ಲಿದೊರೆಯುವ ಅಂತ್ಯವಿಲ್ಲದ ಮಾಹಿತಿಯಲ್ಲಿಮುಳುಗಿ ಹೋಗಿರುವ ಜೆನ್ ಜಿ ಗಳು ಧರ್ಮ, ಸಾಂಸ್ಕೃತಿಕ ಆಚರಣೆಗಳು, ಆಧ್ಯಾತ್ಮಿಕತೆಯಂತಹ ಸಾಂಪ್ರದಾಯಿಕ ವಿಷಯಗಳಿಂದ ವಿಮುಖರಾಗುತ್ತಿದ್ದಾರೆ. ಮಾನವ ಜನ್ಮದ ಘನ ಉದ್ದೇಶ ಮತ್ತು ಜೀವನದ ಅರ್ಥವನ್ನು ತಿಳಿಯುವ ಆಸಕ್ತಿ ನಶಿಸುತ್ತಿದೆ.

ಸಾಮಾಜಿಕ ಮಾಧ್ಯಮ ವಿರೋಧಾಭಾಸ: ಜನರನ್ನು ಸಂಪರ್ಕಿಸಲು ವಿನ್ಯಾಸಗೊಳಿಸಲಾದ ಸಾಮಾಜಿಕ ಮಾಧ್ಯಮ ಅನೇಕ ಜೆನ್ ಜಿ ಗಳನ್ನು ನೈಜ ಬದುಕಿನ ಜನರಿಂದ ಪ್ರತ್ಯೇಕಗೊಳಿಸಿದೆ. ಫೇಸ್ ಬುಕ್ , ಇನ್ ಸ್ಟಾಗ್ರಾಂ ಇತ್ಯಾದಿಗಳಲ್ಲಿನಿರಂತರ ಸಂಪರ್ಕದಲ್ಲಿದ್ದರೂ ಅವರು ಒಬ್ಬರನ್ನೊಬ್ಬರು ನೈಜ ಬದುಕಿನಲ್ಲಿಸಂಧಿಸುವುದು ಅಪರೂಪ. ಇದು ಡಿಜಿಟಲ್ ‘ಆಪ್ತತೆ’ಯ ವ್ಯಂಗ್ಯವನ್ನು ಎತ್ತಿ ತೋರಿಸುತ್ತದೆ.

ಒತ್ತಡ: ಶೈಕ್ಷಣಿಕ ಮತ್ತು ವೃತ್ತಿಜೀವನಗಳಲ್ಲಿನ ಸ್ಪರ್ಧಾತ್ಮಕ ವಾತಾವರಣವು ಒತ್ತಡವನ್ನು ಹೆಚ್ಚಿಸಿದೆ. ಅನೇಕ ಯುವಕರು ತಮ್ಮ ಮೌಲ್ಯವು ಉನ್ನತ ಅಂಕಗಳನ್ನು ಗಳಿಸುವುದು ಅಥವಾ ಪ್ರತಿಷ್ಠಿತ ಉದ್ಯೋಗಗಳನ್ನು ಪಡೆಯುವುದರ ಮೇಲೆ ನಿಂತಿದೆ ಎಂದು ಭಾವಿಸುತ್ತಾರೆ. ಉದಾಹರಣೆ: ಸ್ಪರ್ಧಾತ್ಮಕ ಪರೀಕ್ಷೆಗಳಿಗೆ ತಯಾರಿ ನಡೆಸುತ್ತಿರುವ ವಿದ್ಯಾರ್ಥಿಗಳು ತಮ್ಮ ಭವಿಷ್ಯವು ಕೇವಲ ಪರೀಕ್ಷೆಯ ಯಶಸ್ಸಿನ ಮೇಲೆ ಅವಲಂಬಿತವಾಗಿದೆ ಎಂದು ಭಾವಿಸುತ್ತಾರೆ. ಸೃಜನಶೀಲತೆಯಿದ್ದರೆ ಪರ್ಯಾಯ ವೃತ್ತಿ ಮಾರ್ಗಗಳಿವೆ ಎಂಬುದನ್ನು ಮರೆತಿದ್ದಾರೆ.

ಎಲ್ಲಬಲ್ಲವರೆಂಬ ಅಹಂಕಾರ: ಬಹುತೇಕ ವಿಷಯಗಳನ್ನು ಸಾಮಾಜಿಕ ಮಾಧ್ಯಮಗಳಿಂದಲೇ ತಿಳಿದುಕೊಳ್ಳುವ ಇಂದಿನ ಜೆನ್ ಜಿ ಗಳು ತಮಗೆ ಎಲ್ಲವೂ ತಿಳಿದಿದೆ ಎಂಬ ಅಹಂನಲ್ಲಿರುವುದೂ ಕಂಡುಬರುತ್ತದೆ. ಸಾಮಾಜಿಕ ಮಾಧ್ಯಮಗಲ್ಲಿದೊರೆಯುವ ಬಹುತೇಕ ಮಾಹಿತಿಗೆ ಯಾವುದೇ ಖಚಿತ ಮೂಲಗಳಿರುವುದಿಲ್ಲ.

ನಶಿಸುತ್ತಿರುವ ಗೌರವ: ತಾವು ಏನೋ ದೊಡ್ಡದಾದುದನ್ನು ಸಾಧಿಸಿಬಿಟ್ಟಿದ್ದೇವೆ ಎಂಬ ಭ್ರಮೆಯಲ್ಲಿರುವ ಕೆಲವು ಜೆನ್ ಜಿ ಗಳು ದೇಶದ ಬಗ್ಗೆ, ನಮ್ಮ ಸೈನ್ಯದ ಬಗ್ಗೆ, ರಾಷ್ಟ್ರದ ನಾಯಕರ ಬಗ್ಗೆ ಕೆಟ್ಟದಾಗಿ ಮಾತನಾಡುವುದನ್ನು ಇತ್ತೀಚಿನ ಜಂತರ್ ಮಂತರ್ ಪ್ರತಿಭಟನೆಯಲ್ಲಿಗಮನಿಸಿದ್ದೇವೆ. ಹಾಗೆಯೇ, ಯುವತಿಯೊಬ್ಬಳು ತಾನು ಜೆನ್ ಜಿ ಗೆ ಸೇರಿದವಳೆಂದು ಹೇಳಿಕೊಂಡು ನಮ್ಮ ಸೈನಿಕರ ವಿರುದ್ಧ ಅತ್ಯಂತ ತುಚ್ಛ ಪದಗಳನ್ನು ಬಳಸಿರುವುದನ್ನು ನೋಡಿದ್ದೇವೆ.

ಉಪಸಂಹಾರ

ಮಾನವ ಕುಲದ ವಿಕಾಸದ ಹಾದಿಯಲ್ಲಿಹಿಂದಿನ ತಲೆಮಾರಗಳಿಗಿಂತ ಹೊಸ ತಲೆಮಾರುಗಳ ಜನರು ಹೊಸದನ್ನು ಸಾಧಿಸುತ್ತ ಬಂದಿರುವುದು ಸ್ಪಷ್ಟವಾಗಿದೆ. ಹಾಗೆಯೇ, ಇಂದಿನ ಜೆನ್ ಜಿ ಗಳು ಡಿಜಿಟಲ್ ಯುಗದಲ್ಲಿಹುಟ್ಟಿ ಬೆಳೆದವರಾಗಿರುವುದರಿಂದ ಸಾಧನೆಯ ಹೊಸ ಮಜಲನ್ನು ಏರುವ ಸಾಮರ್ಥ್ಯ ಹೊಂದಿದವರಾಗಿದ್ದಾರೆ. ಆದರೆ, ಹೊಸ ಚಿಗುರಿಗೆ ಹಳೆ ಬೇರು ಆಸರೆ ಎಂಬುದನ್ನು ಅರಿತುಕೊಂಡು ನಡೆಯಬೇಕಾದ ಅವಶ್ಯಕತೆಯೂ ಇದೆ.

ಓದಲೇ ಬೇಕಾದ ಸುದ್ದಿ