ಮತ್ತೆ 3 ಲಕ್ಷ ರೂ. ಸಮೀಪಕ್ಕೆ ಬಂದ ಬೆಳ್ಳಿ ಬೆಲೆ

Contributed by: Venkat K|Vijaya Karnataka•

ಚಿನ್ನ ಮತ್ತು ಬೆಳ್ಳಿ ಬೆಲೆಗಳು ಈ ವಾರ ಏರಿಕೆ ಕಂಡಿವೆ. ಅಮೆರಿಕ ಮತ್ತು ಇರಾನ್ ನಡುವಿನ ಸಂಘರ್ಷದಿಂದಾಗಿ ಬೆಳ್ಳಿ ಬೆಲೆ ಕೆಜಿಗೆ 14,300 ರೂ. ಏರಿ 2,98,300 ರೂ. ತಲುಪಿದೆ. ಬೆಂಗಳೂರಿನಲ್ಲಿಯೂ ಚಿನ್ನ ಮತ್ತು ಬೆಳ್ಳಿ ಬೆಲೆ ಗಣನೀಯವಾಗಿ ಹೆಚ್ಚಳವಾಗಿದೆ. ಹೂಡಿಕೆದಾರರಿಗೆ ಲಾಭದ ಖಾತ್ರಿ ಇರುವುದರಿಂದ ಖರೀದಿ ಹೆಚ್ಚುತ್ತಿದೆ.

silver price surge approaching 3 lakh rupees
ಕಳೆದ ವಾರ ಕುಸಿತ ಕಂಡಿದ್ದ ಚಿನ್ನ ಮತ್ತು ಬೆಳ್ಳಿ ಬೆಲೆ ಗಳು ಈ ವಾರ ದಿಢೀರ್ ಏರಿಕೆ ಕಂಡಿವೆ. ಅಮೆರಿಕ ಮತ್ತು ಇರಾನ್ ನಡುವಿನ ಬಿಗಡಾಯಿಸುತ್ತಿರುವ ಸಂಬಂಧ, ಹೂಡಿಕೆದಾರರಿಗೆ ಲಾಭದ ಭರವಸೆ, ಮತ್ತು ಅಮೂಲ್ಯ ಲೋಹಗಳಿಗೆ ಹೆಚ್ಚಿದ ಬೇಡಿಕೆ ಈ ಏರಿಕೆಗೆ ಪ್ರಮುಖ ಕಾರಣಗಳಾಗಿವೆ. ಇದರಿಂದಾಗಿ ಬುಧವಾರ ಅಪರಂಜಿ ಚಿನ್ನದ ಬೆಲೆ 10 ಗ್ರಾಂಗೆ 7,400 ರೂ. ಏರಿ 1,65,100 ರೂ. ತಲುಪಿದೆ. ಬೆಳ್ಳಿ ಬೆಲೆ ಕೆ.ಜಿಗೆ 14,300 ರೂ. ಏರಿ 2,98,300 ರೂ. ಆಗಿದೆ ಎಂದು ಅಖಿಲ ಭಾರತ ಸರಾಫ್‌ ಸಂಘ ತಿಳಿಸಿದೆ.

ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲೂ ಚಿನ್ನ ಮತ್ತು ಬೆಳ್ಳಿ ಬೆಲೆಗಳು ಗಣನೀಯವಾಗಿ ಏರಿವೆ. ಬೆಳ್ಳಿ ಬೆಲೆ ಔನ್ಸ್‌ಗೆ 4.28 ಡಾಲರ್ ಹೆಚ್ಚಿ 89.35 ಡಾಲರ್‌ ತಲುಪಿದೆ. ಬಂಗಾರದ ಬೆಲೆ 100.03 ಡಾಲರ್ ಏರಿಕೆಯೊಂದಿಗೆ ಔನ್ಸ್‌ಗೆ 5,047.07 ಡಾಲರ್‌ಗೆ ತಲುಪಿದೆ. ಈ ಏರಿಕೆಯು ಹೂಡಿಕೆದಾರರಿಗೆ ಲಾಭದ ಖಾತ್ರಿ ನೀಡುತ್ತಿದ್ದು, ಖರೀದಿ ಹೆಚ್ಚಾಗಲು ಕಾರಣವಾಗಿದೆ.
ಬೆಂಗಳೂರಿನಲ್ಲಿಯೂ ಚಿನ್ನ ಮತ್ತು ಬೆಳ್ಳಿ ಬೆಲೆಗಳು ಗಗನಕ್ಕೇರಿವೆ. ಇಲ್ಲಿ ಅಪರಂಜಿ ಚಿನ್ನದ ಬೆಲೆ 10 ಗ್ರಾಂಗೆ 5,510 ರೂ. ಏರಿ 1,59,440 ರೂ.ಗೆ ಮಾರಾಟವಾಗಿದೆ. ಆಭರಣ ಚಿನ್ನದ ಬೆಲೆ 10 ಗ್ರಾಂಗೆ 5,050 ರೂ. ಜಿಗಿದು 1,46,150 ರೂ. ಆಗಿದೆ. 18 ಕ್ಯಾರೆಟ್ ಚಿನ್ನದ ಬೆಲೆ 10 ಗ್ರಾಂಗೆ 4,130 ರೂ. ಹೆಚ್ಚಳ ಕಂಡಿದೆ. ಬೆಳ್ಳಿ ಬೆಲೆ ಕೆ.ಜಿಗೆ ಬರೋಬ್ಬರಿ 40 ಸಾವಿರ ರೂ. ಏರಿ 3,20,000 ರೂ. ತಲುಪಿದೆ. ಡಾಲರ್ ಮೌಲ್ಯ ಏರಿಕೆಯಾಗದಿದ್ದರೂ, ಈ ಲೋಹಗಳ ಬೆಲೆ ಏರಿಕೆಗೆ ಜಾಗತಿಕ ರಾಜಕೀಯ ಪರಿಸ್ಥಿತಿ ಮತ್ತು ಹೂಡಿಕೆದಾರರ ಆಸಕ್ತಿ ಪ್ರಮುಖ ಪಾತ್ರವಹಿಸಿವೆ.

ಓದಲೇ ಬೇಕಾದ ಸುದ್ದಿ