ರಕ್ಷಣಾ ವಲಯದಲ್ಲಿಮೇಕ್ ಇನ್ ಇಂಡಿಯಾ
- ಆತ್ಮನಿರ್ಭರತೆಯತ್ತ ಭಾರತದ ದಿಟ್ಟ ಹೆಜ್ಜೆ
ಧಿ- ದಾಖಲೆಯ ಬಜೆಟ್ ಹಂಚಿಕೆ
- ರಫ್ತಿನಲ್ಲಿಭಾರಿ ಏರಿಕೆ
- ಡ್ರೋನ್ ತಂತ್ರಜ್ಞಾನಕ್ಕೆ ಹೆಚ್ಚಿನ ಒತ್ತು
ಜಾಗತಿಕವಾಗಿ ನಡೆಯುತ್ತಿರುವ ಯುದ್ಧಗಳು ಮತ್ತು ಪೂರೈಕೆ ಸರಪಳಿಯ ಏರುಪೇರುಗಳ ನಡುವೆ, ಭಾರತವು ರಕ್ಷಣಾ ವಲಯದಲ್ಲಿಪರಾವಲಂಬನೆ ಬಿಟ್ಟು ‘ಆತ್ಮನಿರ್ಭರ’ವಾಗಲು ವೇಗವಾಗಿ ಹೆಜ್ಜೆ ಹಾಕುತ್ತಿದೆ. ಈ ಕುರಿತು ಬಿಡುಗಡೆಯಾಗಿರುವ ಇತ್ತೀಚಿನ ವಿಶ್ಲೇಷಣೆಯು ಭಾರತದ ರಕ್ಷಣಾ ಉತ್ಪಾದನಾ ಸಾಮರ್ಥ್ಯ ಮತ್ತು ಸವಾಲುಗಳ ಮೇಲೆ ಬೆಳಕು ಚೆಲ್ಲಿದೆ.
ಕೇಂದ್ರ ಸರಕಾರವು 2026-27ನೇ ಸಾಲಿಗೆ ರಕ್ಷಣಾ ಸಚಿವಾಲಯಕ್ಕೆ ದಾಖಲೆಯ 7.85 ಲಕ್ಷ ಕೋಟಿ ಅನುದಾನ ನೀಡಿದೆ. ಇದು ಒಟ್ಟು ಸರಕಾರಿ ವೆಚ್ಚದ ಶೇ. 14.67ರಷ್ಟಾಗಿದೆ. ವಿಶೇಷವೆಂದರೆ, ಶಸ್ತಾ್ರಸ್ತ್ರಗಳ ಖರೀದಿಗಾಗಿ ಮೀಸಲಿಟ್ಟ ಬಜೆಟ್ ನಲ್ಲಿಶೇ. 75ರಷ್ಟು ಭಾಗವನ್ನು (1.39 ಲಕ್ಷ ಕೋಟಿ) ದೇಶೀಯ ಕೈಗಾರಿಕೆಗಳಿಂದಲೇ ಖರೀದಿಸಲು ಸರಕಾರ ನಿರ್ಧರಿಸಿದೆ.
ಭಾರತವು ಈಗ ಕೇವಲ ಶಸ್ತಾ್ರಸ್ತ್ರ ಆಮದು ಮಾಡಿಕೊಳ್ಳುವ ದೇಶವಾಗಿ ಉಳಿದಿಲ್ಲ. 2025-26ನೇ ಸಾಲಿನಲ್ಲಿಭಾರತದ ರಕ್ಷಣಾ ರಫ್ತು 38,424 ಕೋಟಿಗೆ ತಲುಪಿದೆ. ಇದು ಕಳೆದ ದಶಕಕ್ಕೆ ಹೋಲಿಸಿದರೆ 31 ಪಟ್ಟು ಹೆಚ್ಚಳವಾಗಿದ್ದು, ಇಂಡೋನೇಷ್ಯಾಕ್ಕೆ ಬ್ರಹ್ಮೋಸ್ ಕ್ಷಿಪಣಿಗಳನ್ನು ಪೂರೈಸುವಂತಹ ಐತಿಹಾಸಿಕ ಒಪ್ಪಂದಗಳು ಭಾರತದ ಶಕ್ತಿಯನ್ನು ಜಗತ್ತಿಗೆ ಸಾರಿವೆ.
ಇತ್ತೀಚಿನ ಜಾಗತಿಕ ಯುದ್ಧಗಳ ಪಾಠದಂತೆ, ಕಡಿಮೆ ವೆಚ್ಚದ ಡ್ರೋನ್ ಮತ್ತು ಆಧುನಿಕ ತಂತ್ರಜ್ಞಾನಗಳು ಯುದ್ಧದ ದಿಕ್ಕನ್ನು ಬದಲಿಸುತ್ತಿವೆ. ಇದನ್ನು ಗಮನದಲ್ಲಿಟ್ಟುಕೊಂಡು ಭಾರತದ ಖಾಸಗಿ ವಲಯವು ಡ್ರೋನ್ ಉತ್ಪಾದನೆಯಲ್ಲಿತೊಡಗಿಸಿಕೊಂಡಿದೆ. ರಕ್ಷಣಾ ತಂತ್ರಜ್ಞಾನದ ಸ್ಟಾರ್ಟಪ್ ಗಳಿಗೆ ಹೂಡಿಕೆದಾರರಿಂದ ಭಾರಿ ಬೆಂಬಲ ಸಿಗುತ್ತಿದ್ದು, ಹೂಡಿಕೆಯ ಪ್ರಮಾಣವು 2016ರಿಂದ 2025ರ ನಡುವೆ 61 ಪಟ್ಟು ಹೆಚ್ಚಾಗಿದೆ.
ಪ್ರಮುಖ ಸವಾಲುಗಳು: ಸಾಧನೆಗಳ ನಡುವೆಯೂ ಕೆಲವು ಅಡೆತಡೆಗಳು ಎದುರಾಗಿವೆ. ರಕ್ಷಣಾ ಯೋಜನೆಗಳ ಅನುಮೋದನೆ ಪ್ರಕ್ರಿಯೆಯಲ್ಲಿವಿಳಂಬವಾಗುತ್ತಿದ್ದು, 178 ಯೋಜನೆಗಳ ಪೈಕಿ 119 ಯೋಜನೆಗಳು ಸಮಯಕ್ಕೆ ಸರಿಯಾಗಿ ಪೂರ್ಣಗೊಂಡಿಲ್ಲ. ಅಲ್ಲದೆ, ಪ್ರಮುಖ ಬಿಡಿಭಾಗಗಳಾದ ಸೆನ್ಸರ್ ಮತ್ತು ಸೆಮಿಕಂಡಕ್ಟರ್ ಚಿಪ್ ಗಳಿಗಾಗಿ ಭಾರತ ಇಂದಿಗೂ ಅಮೆರಿಕ ಮತ್ತು ರಷ್ಯಾದಂತಹ ದೇಶಗಳ ಮೇಲೆ ಅವಲಂಬಿತವಾಗಿದೆ.
ಖಾಸಗಿ ಮತ್ತು ಸರಕಾರಿ ವಲಯದ ಅಸಮತೋಲನ: ರಕ್ಷಣಾ ಉತ್ಪಾದನೆಯಲ್ಲಿಶೇ. 70 ರಷ್ಟು ಪಾಲನ್ನು ಇಂದಿಗೂ ಸರಕಾರಿ ಸ್ವಾಮ್ಯದ ಸಂಸ್ಥೆಗಳೇ ಹೊಂದಿವೆ. ಖಾಸಗಿ ಕಂಪನಿಗಳಿಗೆ ಸಮಾನ ಅವಕಾಶ ನೀಡುವಲ್ಲಿಮತ್ತು ಅವರಿಗೆ ಅಗತ್ಯವಿರುವ ಆರ್ಥಿಕ ಸೌಲಭ್ಯಗಳನ್ನು ಒದಗಿಸುವಲ್ಲಿಇಂದಿಗೂ ತಾರತಮ್ಯವಿದೆ ಎಂಬುದು ತಜ್ಞರ ಅಭಿಪ್ರಾಯವಾಗಿದೆ. ಭಾರತವು ಸಂಪೂರ್ಣವಾಗಿ ಸ್ವಾವಲಂಬಿಯಾಗಲು ಖಾಸಗಿ ಕಂಪನಿಗಳಿಗೆ ಸರಕಾರಿ ಸಂಸ್ಥೆಗಳಷ್ಟೇ ಸಮಾನ ಅವಕಾಶ ನೀಡಬೇಕಿದೆ. ರಕ್ಷಣಾ ಸಂಶೋಧನೆಯಲ್ಲಿತೊಡಗಿರುವ ವಿಜ್ಞಾನಿಗಳಿಗೆ ಜಾಗತಿಕ ಮಟ್ಟದ ವೇತನ ನೀಡಿ ಪ್ರತಿಭೆಗಳು ಹೊರದೇಶಕ್ಕೆ ಹೋಗದಂತೆ ತಡೆಯಬೇಕು. ಹಾರ್ಡ್ ವೇರ್ ಜೊತೆಗೆ ಸೈಬರ್ ಯುದ್ಧ ಮತ್ತು ಕೃತಕ ಬುದ್ಧಿಮತ್ತೆ ತಂತ್ರಜ್ಞಾನಕ್ಕೆ ಹೆಚ್ಚು ಬಜೆಟ್ ಮೀಸಲಿಡುವುದು ಇಂದಿನ ಅಗತ್ಯವಾಗಿದೆ.
ಬಾಕ್ಸ್ :
ರಕ್ಷಣಾ ಕೈಗಾರಿಕಾ ಕಾರಿಡಾರ್ ಗಳು
ಉತ್ತರ ಪ್ರದೇಶ ಮತ್ತು ತಮಿಳುನಾಡಿನಲ್ಲಿಸ್ಥಾಪಿಸಲಾದ ರಕ್ಷಣಾ ಕಾರಿಡಾರ್ ಗಳು ದೇಶೀಯ ಸಣ್ಣ ಮತ್ತು ಮಧ್ಯಮ ಕೈಗಾರಿಕೆಗಳನ್ನು ಬಲಪಡಿಸುತ್ತಿವೆ. ಇಲ್ಲಿಯವರೆಗೆ ಸುಮಾರು 9,145 ಕೋಟಿ ಹೂಡಿಕೆಯಾಗಿದ್ದು, 16,000 ಕ್ಕೂ ಹೆಚ್ಚು ಸಣ್ಣ ಉದ್ದಿಮೆಗಳು ಈ ಜಾಲಕ್ಕೆ ಸೇರ್ಪಡೆಗೊಂಡಿವೆ. ಇದರಿಂದ ಸ್ಥಳೀಯವಾಗಿ ಉದ್ಯೋಗಾವಕಾಶಗಳೂ ಸೃಷ್ಟಿಯಾಗುತ್ತಿವೆ.
