ಅಪಾಚೆ ಹೆಲಿಕಾಪ್ಟರ್
ಇರಾನ್ -ಇಸ್ರೇಲ್ ಯುದ್ಧದ ಒತ್ತಡದ ನಡುವೆಯೇ ಅಮೆರಿಕವು ಭಾರತಕ್ಕೆ ಸಿಹಿ ಸುದ್ದಿ ನೀಡಿದೆ. ಭಾರತೀಯ ವಾಯು ಸೇನೆ ಹಾಗೂ ಭೂ ಸೇನೆ ಬಳಿ ಇರುವ ಅತ್ಯಾಧುನಿಕ ಅಪಾಚೆ ಹೆಲಿಕಾಪ್ಟರ್ ಗಳಿಗೆ ಬೆಂಬಲಿತ ಸೇವೆಗಳನ್ನು ನೀಡಲು ಹಾಗೂ ಹೆಲಿಕಾಪ್ಟರ್ ಗಳಲ್ಲೂಸಾಗಿಸುವಷ್ಟು ಹಗುರವಾಗಿರುವ ಅತ್ಯಾಧುನಿಕ ಹೊವಿಟ್ಜರ್ (ಫಿರಂಗಿ) ಗಳನ್ನು ನೀಡಲು ಅಮೆರಿಕ ಸರಕಾರ ಅನುಮೋದನೆ ನೀಡಿದೆ ಎಂದು ಅಲ್ಲಿನ ವಿದೇಶಾಂಗ ಇಲಾಖೆ ತಿಳಿಸಿದೆ.
ಹೊಸ ಒಪ್ಪಂದವು ಸುಮಾರು 19 ಸಾವಿರ ಕೋಟಿಯ ಮೊತ್ತದ್ದಾಗಿದೆ ಎಂದು ಪಿಟಿಐ ವರದಿ ಮಾಡಿದೆ. ಈಗಾಗಲೇ ಭಾರತದ ವಿವಿಧ ಸೇನೆಗಳಲ್ಲಿ28 ಅಪಾಚೆ ಹೆಲಿಕಾಪ್ಟರ್ ಗಳಿವೆ. ಇವುಗಳಿಗೆ ನಿರಂತರವಾಗಿ ಬೆಂಬಲಿತ ಸೇವೆಗಳನ್ನು, ಸಲಕರಣೆಗಳನ್ನು ನೀಡಲು ಈ ಅನುಮೋದನೆ ಅನುಕೂಲ ಮಾಡಿಕೊಡುತ್ತದೆ. ಹಾಗೆಯೇ ಸೇನೆಗೆ ಎಂ777ಎ2 - ಕಡಿಮೆ ತೂಕದ ಹೊವಿಟ್ಜರ್ ಗಳು ಸುಲಭವಾಗಿ ಸಿಗಲಿವೆ.
ಅಪಾಚೆ ಹಿನ್ನೆಲೆ: 1970ರ ದಶಕದ ಆರಂಭದಲ್ಲಿಅಮೆರಿಕ ಸೇನೆಯು ತನ್ನ ಹಳೆಯ ಹೆಲಿಕಾಪ್ಟರ್ ಗಳನ್ನು ಬದಲಿಸಿ ಅತ್ಯಾಧುನಿಕ ಯುದ್ಧ ವಿಮಾನವನ್ನು ಹೊಂದುವ ಗುರಿಯನ್ನು ಹಾಕಿಕೊಂಡಿತು. ಆಗ ಪ್ರಾರಂಭವಾಗಿದ್ದೇ ಅಪಾಚೆ ಎಎಚ್ -64 ಹೆಲಿಕಾಪ್ಟರ್ ಇತಿಹಾಸ. 1975ರಲ್ಲಿಮೊದಲ ಬಾರಿಗೆ ಹಾರಾಟ ನಡೆಸಿದ ಈ ಹೆಲಿಕಾಪ್ಟರ್ 1984ರಲ್ಲಿಅಧಿಕೃತವಾಗಿ ಸೇನೆಯನ್ನು ಸೇರಿತು ಮತ್ತು ಅಂದಿನಿಂದ ಇಂದಿನವರೆಗೆ ಗಲ್ ್ಫ ಯುದ್ಧ ಮತ್ತು ಅಫ್ಘಾನಿಸ್ತಾನದಂತಹ ಪ್ರಮುಖ ಸಂಘರ್ಷಗಳಲ್ಲಿತನ್ನ ಅಪ್ರತಿಮ ಶಕ್ತಿಯನ್ನು ಸಾಬೀತುಪಡಿಸಿದೆ. ಕಾಲಕ್ರಮೇಣ ಇದು ಹಳೆಯ ತಂತ್ರಜ್ಞಾನದಿಂದ ಇಂದಿನ ಡಿಜಿಟಲ್ ಯುಗಕ್ಕೆ ತಕ್ಕಂತೆ ಅಪ್ ಗ್ರೇಡ್ ಆಗುತ್ತಾ ಬಂದಿದ್ದು, ಭಾರತವು ಈಗ ಬಳಸುತ್ತಿರುವ ಎಎಚ್ -64ಇ ಗಾರ್ಡಿಯನ್ ಆವೃತ್ತಿಯು ವಿಶ್ವದ ಅತ್ಯಂತ ಬಲಿಷ್ಠ ಅಟ್ಯಾಕ್ ಹೆಲಿಕಾಪ್ಟರ್ ಎಂದು ಹೆಸರುವಾಸಿಯಾಗಿದೆ. ಇದು ಎಷ್ಟು ಅತ್ಯಾಧುನಿಕವಾಗಿದೆಯೆಂದರೆ ಇದರ ಇಂಧನ ಟ್ಯಾಂಕ್ ಗೆ ಗುಂಡು ತಗುಲಿದರೂ ಅದು ತಾನಾಗಿಯೇ ಆ ರಂಧ್ರವನ್ನು ಮುಚ್ಚಿಕೊಳ್ಳುತ್ತದೆ.
ಸೇನೆಗೆ ಬಲ: ಇದು ಶತ್ರುಗಳ ಟ್ಯಾಂಕ್ ಗಳನ್ನು ಮತ್ತು ಅಡಗುತಾಣಗಳನ್ನು ಕಿಲೋಮೀಟರ್ ಗಳಷ್ಟು ದೂರದಿಂದಲೇ ಪತ್ತೆಹಚ್ಚಿ ಧ್ವಂಸಗೊಳಿಸುವುದರಿಂದ ಇದನ್ನು ಟ್ಯಾಂಕ್ ಕಿಲ್ಲರ್ ಎಂದು ಕರೆಯಲಾಗುತ್ತದೆ. ಭೂಮಿಯ ಮೇಲೆ ಹೋರಾಡುವ ಸೈನಿಕರಿಗೆ ಇದು ಆಕಾಶದಿಂದ ರಕ್ಷಣೆ ನೀಡುತ್ತದೆ ಮತ್ತು ದಟ್ಟವಾದ ಮಂಜು ಅಥವಾ ಕತ್ತಲೆಯಲ್ಲಿಯೂ ನಿಖರವಾಗಿ ದಾಳಿ ಮಾಡುವ ಸಾಮರ್ಥ್ಯ ಹೊಂದಿದೆ. ಇತ್ತೀಚಿನ ತಂತ್ರಜ್ಞಾನದ ಮೂಲಕ ಪೈಲಟ್ ಗಳು ತಮ್ಮ ಹೆಲಿಕಾಪ್ಟರ್ ನಿಂದಲೇ ಸಣ್ಣ ಡ್ರೋನ್ ಗಳನ್ನು ನಿಯಂತ್ರಿಸಿ ಶತ್ರುಗಳ ಮಾಹಿತಿಯನ್ನು ಪಡೆಯಬಹುದು, ಇದು ಯುದ್ಧದ ಸಮಯದಲ್ಲಿಸೈನಿಕರ ಪ್ರಾಣ ಹಾನಿಯನ್ನು ತಪ್ಪಿಸಲು ಮತ್ತು ಶತ್ರುಗಳ ಮೇಲೆ ಮೇಲುಗೈ ಸಾಧಿಸಲು ಸೇನೆಗೆ ಬಹಳಷ್ಟು ಸಹಾಯ ಮಾಡುತ್ತದೆ.
ಕಾರ್ಯವಿಧಾನ: ಅಪಾಚೆ ಹೆಲಿಕಾಪ್ಟರ್ ಕೆಲಸ ಮಾಡುವ ವಿಧಾನವು ಅತ್ಯಂತ ಸಂಕೀರ್ಣ ಮತ್ತು ವಿಸ್ಮಯಕಾರಿಯಾಗಿದೆ. ಇದರ ಮುಂಭಾಗದಲ್ಲಿರುವ ಸೆನ್ಸಾರ್ ಗಳು ಶಾಖವನ್ನು ಗುರುತಿಸುವ ಮೂಲಕ ಶತ್ರುಗಳ ಇರುವಿಕೆಯನ್ನು ಪತ್ತೆ ಮಾಡುತ್ತವೆ ಮತ್ತು ಪೈಲಟ್ ಧರಿಸುವ ಹೆಲ್ಮೆಟ್ ಅವರ ಕಣ್ಣಿನ ಚಲನೆಗೆ ತಕ್ಕಂತೆ ಹೆಲಿಕಾಪ್ಟರ್ ನ ಕೆಳಗಿರುವ ಗನ್ ಅನ್ನು ತಿರುಗಿಸುತ್ತದೆ. ಅಂದರೆ ಪೈಲಟ್ ಎತ್ತ ನೋಡುತ್ತಾರೋ ಅತ್ತ ಗುಂಡುಗಳು ತೂರಿ ಹೋಗುತ್ತವೆ. ಇದರ ಡಬಲ್ ಎಂಜಿನ್ ವ್ಯವಸ್ಥೆಯು ಒಂದು ಎಂಜಿನ್ ಕೆಟ್ಟುಹೋದರೂ ಹೆಲಿಕಾಪ್ಟರ್ ಅನ್ನು ಸುರಕ್ಷಿತವಾಗಿ ಹಾರಿಸುವ ಶಕ್ತಿಯನ್ನು ನೀಡುತ್ತದೆ. ಹೆಲ್ ಫೈರ್ ಕ್ಷಿಪಣಿಗಳು ಮತ್ತು ನಿಮಿಷಕ್ಕೆ ನೂರಾರು ಗುಂಡುಗಳನ್ನು ಹಾರಿಸುವ 30 ಎಂಎಂ ಚೈನ್ ಗನ್ ವ್ಯವಸ್ಥೆಯು ಅಪಾಚೆ ಹೆಲಿಕಾಪ್ಟರ್ ಅನ್ನು ಯಾವುದೇ ಶತ್ರುಪಡೆಗೆ ಸಿಂಹಸ್ವಪ್ನವನ್ನಾಗಿ ಮಾಡುತ್ತದೆ.
