ವಿಕ ಸುದ್ದಿಲೋಕ ಭಾಲ್ಕಿ ಬಸವಾದಿ ಶಿವಶರಣರ ಹೆಸರಿನಲ್ಲಿನ ಹಿಂದೂ ಸಮಾವೇಶವನ್ನು ನಾಡಿನ ಪ್ರಗತಿಪರ ಚಿಂತಕರು. ಎಲ್ಲತಳ ಸಮುದಾಯಗಳ ಜನರು ವಿರೋಧಿಸಿ ಸೆ.25ರಂದು ಕಲಬುರಗಿಯಲ್ಲಿನಡೆಸುತ್ತಿರುವ ಪ್ರತಿಭಟನೆಗೆ ಲಿಂಗಾಯತ ಮಠಾಧಿಪತಿಗಳ ಒಕ್ಕೂಟದ ಬೆಂಬಲವಿದೆ ಎಂದು ಒಕ್ಕೂಟ ಅಧ್ಯಕ್ಷ ನಾಡೋಜ ಬಸವಲಿಂಗ ಪಟ್ಟದ್ದೇವರು ತಿಳಿಸಿದ್ದಾರೆ. ಈ ಸಂಬಂಧ ಪ್ರಕಟಣೆ ಹೊರಡಿಸಿರುವ ಅವರು, ಬಸವಾದಿ ಶಿವಶರಣರ ಮೂಲ ಆಶಯಗಳಿಗೆ ಧಕ್ಕೆ ತರುವ ಕಾರ್ಯವನ್ನು ನಾವೆಲ್ಲರೂ ನೈತಿಕ ನೆಲಗಟ್ಟಿನ ಮೇಲೆ ಸಂವಿಧಾನಿಕ ಹಿನ್ನೆಲೆಯಲ್ಲಿವಿರೋಧಿಸಬೇಕಿದೆ. ಬಸವಾದಿ ಶಿವಶರಣರು ಸಮ ಸಮಾಜದ ಕನಸು ಕಂಡವರು, ಮೇಲು-ಕೀಳು ಬಡವ ಬಲ್ಲಿದ ಮುಂತಾದ ಶ್ರೇಣಿಕೃತ ಜಾತಿಯ ವ್ಯವಸ್ಥೆಯನ್ನು ವಿರೋಧಿಸಿದವರು. ಸಮಾನತೆಗಾಗಿ ಜೀವ ತೆತ್ತವರು. ಸಮಾಜೋ ಧಾರ್ಮಿಕ ಅರಿವಿನೊಂದಿಗೆ ಕಾಯಕ ದಾಸೋಹ ಸಮಾನತೆಯ ದಿಕ್ಷೆ ನೀಡಿದವರು. ಅವರ ತ್ಯಾಗ ಬಲಿದಾನಗಳನ್ನು ನಾವು ಮರೆಯಲಾಗುವುದಿಲ್ಲ. ಸರಕಾರ ಹಾಗೂ ಆಡಳಿತಾತ್ಮಕ ಮುಖ್ಯಸ್ಥರು ಈ ಕುರಿತು ಕಠಿಣ ಕ್ರಮವನ್ನು ಕೈಗೊಳ್ಳಬೇಕು. ನಾಡಿನಲ್ಲಿಶಾಂತಿ, ಸಮಾಧಾನ ನೆಲೆಸುವಂತೆ ನೋಡಿಕೊಳ್ಳಬೇಕು ಎಂದು ಪ್ರಕಟಣೆಯಲ್ಲಿಒತ್ತಾಯಿಸಿದ್ದಾರೆ.
